گفتگو اچھی لگی ذوق نظر اچھا لگا

Author
Published جنوری 24, 2019
گفتگو اچھی لگی ذوق نظر اچھا لگا

گفتگو اچھی لگی ذوق نظر اچھا لگا 
مدتوں کے بعد کوئی ہم سفر اچھا لگا 

دل کا دکھ جانا تو دل کا مسئلہ ہے پر ہمیں 
اس کا ہنس دینا ہمارے حال پر اچھا لگا 

ہر طرح کی بے سر و سامانیوں کے باوجود 
آج وہ آیا تو مجھ کو اپنا گھر اچھا لگا 

باغباں گلچیں کو چاہے جو کہے ہم کو تو پھول 
شاخ سے بڑھ کر کف دل دار پر اچھا لگا 

کوئی مقتل میں نہ پہنچا کون ظالم تھا جسے 
تیغ قاتل سے زیادہ اپنا سر اچھا لگا 

ہم بھی قائل ہیں وفا میں استواری کے مگر 
کوئی پوچھے کون کس کو عمر بھر اچھا لگا 

اپنی اپنی چاہتیں ہیں لوگ اب جو بھی کہیں 
اک پری پیکر کو اک آشفتہ سر اچھا لگا 

میرؔ کے مانند اکثر زیست کرتا تھا فرازؔ 
تھا تو وہ دیوانہ سا شاعر مگر اچھا لگا


ایک تبصرہ شائع کریں

Pages

تمام جملہ حق بحقوق اردو کہانیاں محفوظ ہیں۔ © 2023